यूपीआयवरून होणा-या आर्थिक व्यवहारांवर कोणतेही शुल्क नाही

नवी दिल्ली: एचडीएफसी बँकेने युनिफाईड पेमेंटस् इंटरफेस (यूपीआय) या यंत्रणेचा वापर करून होणाऱ्या आर्थिक व्यवहारांवर शुल्क आकारण्याचा निर्णय जाहीर केला होता. या व्यवहारावर १० जुलैपासून शुल्क आकारले जाणार होते. पण आता एचडीएफसी बँकेने हा निर्णय मागे घेत यूपीआयवरून होणा-या आर्थिक व्यवहारांवर कोणतेही शुल्क द्यावे लागणार नसल्याचे स्पष्ट केले आहे.

आपल्या खातेदारांना एक ई-मेल पाठवून यूपीआय यंत्रणेवर शुल्क लागू होणार असल्याची माहिती एचडीएफसीने दिली होती. त्यानुसार १ रुपया ते २५ हजारांपर्यंतच्या व्यवहारांवर ३ रुपये शुल्क, तर २५ हजार ते १ लाखांपर्यंतच्या व्यवहारावर ५ रुपये शुल्क लागणार असल्याचे जाहीर केले होते. NEFT, RTGS आणि IMPS या सिस्टमद्वारे ही आर्थिक व्यवहार करता येतात. नॅशनल इलेक्ट्रॉनिक फंड ट्रान्सफर (NEFT) सिस्टिमवरून छोट्या रकमांचे व्यवहार करणे तुलनेत स्वस्त आहे. NEFTवर १० हजारांपर्यंतच्या व्यवहारांसाठी २.५ रुपये, तर त्यावरील व्यवहारांसाठी ५ रुपये शुल्क लागते.